Bukod sa mga kamag-anak, nadadalamhati rin sa pagpanaw ng batikang aktor at komedyante na si Subas Herrero ang mga kaibigan niya sa showbiz tulad ni Noel Trinidad.

Nagkasama sina Subas at Noel sa sikat na programa noon sa telebisyon na “Champoy,” na kinabibilangan din nina Gary Lising at Tessie Tomas.

Basahin: Subas Herrero taken to hospital

Pumanaw si Subas noong March 14 sa Amerika dahil sa sakit na pneumonia.

“A week ago lang, magka-usap kami ni Subas eh. Kinukwento niya how optimistic he was na…kasi naka-wheelchair na siya eh, pero meron siyang bagong physical therapy,” kwento ni Noel sa Chika Minute ng GMA news 24 Oras.

“Wala nang gaganda pang memory kundi doon sa ‘Champoy.’ Lahat ng memories ko ng ‘Champoy’ with Subas, eh lahat ay maganda,” dagdag pa niya.

Bukod sa pagiging komedyante, mahusay ding umawit si Subas at batikang kontrabida sa mga pelikula gaya ng “Kahit Butas Ng Karayom, Papasukin Ko,” na pinagbidahan ng yumao na ring si Fernando Poe Jr.