Ngayon Linggo, Pebrero 17, matutunghayan ang dalawang kwento tungkol sa pagsisikap at diskarte sa buhay sa Para Sa ‘Yo Ang Laban Na Ito, kasama ang Pambansang Kamao na si Manny ‘Pacman’ Pacquiao at Kapuso actress Jean Garcia.
 
Ang unang kwento ay ang buhay ni Token Baltazar, isang 32-anyos na tubong Baler. Bagamat galing sa mahirap na pamilya, matagumpay niyang naigapang ang sarili na makatapos ng kolehiyo. Gayunpaman, wala siyang trabaho dahil na rin sa kahinaan ng kanyang loob.
 
Abangan din ang kwento ng Kapuso Kusina Master na si Chef Boy Logro, na tubong Biliran, Leyte. Tulad ng unang kwento, mahirap din ang pamilya ni Chef Boy at hanggang Grade 6 lamang ang inabot niya sa pag-aaral.

Ngunit dahil sa pagsisikap at diskarte, pinatunayan niyang hindi hadlang ang kahirapan sa kanyang mga pangarap. Mula sa pagiging house boy sa Maynila ay naging kauna-unahan at nag-iisang executive chef siya ng isang 5-star hotel dito sa Pilipinas.
 
Ang buhay ni Chief Boy ay hindi nalalayo ang kwento at pinagmulan ni Manny; na mula sa kahirapan ay nagsikap hanggang sa maabot niya ang tagumpay sa larangan ng boxing.
 
Maging inspirasyon kaya  kay Token ang kwento nina Chef Boy at Manny? Malabanan na kaya niya ang kahinaan ng loob? Matuto kaya siyang dumiskarte para maabot ang kanyang mga pangarap?
 
Alamin ang magiging desisyon ni Token na magpapabago sa takbo ng kanyang buhay sa Para Sa ‘Yo Ang Laban Na Ito ngayong Linggo ng gabi pagkatapos ng Imbestigador sa GMA-7. – GMANetwork.com