Ngayong 2012, hindi raw alam ni Richard Gutierrez kung magkakaroon pa siya ng panahon sa lovelife dahil mahahati ang kanyang oras sa trabaho at sa paborito niyang sport ngayon, ang triathlon.

“Right now I’m just really focus on my work,” pahayag ni Richard kay showbiz reporter Lhar Santiaga sa Chika Minute ng GMA news 24 Oras nitong Biyernes.

Ayaw daw ni Richard na magkaroon ng distraction ngayong 2012, na sa pakiramdam niya ay magiging “big year” para sa kanya.

Hindi pa man natatapos ang Survivor Philippines Celebrity Doubles Showdown, kung saan si Richard ang host, nakipagpulong na siya sa creative group ng GMA 7 para pag-usapan ang susunod niyang project.

Ayon kay Richard, excited siya sa susunod niyang project sa GMA 7 na isang action-drama series na hindi pa raw niya nagagawa sa telebisyon.

Naisapinal na umano ang istorya ng serye at casting at location na lang ang pag-uusapan.

Bukod sa trabaho, magiging abala rin si Richard sa sports dahil determinado siyang sumali sa itinuturing isa sa mga pinakamalaking sport event ngayon sa bansa, ang Ironman Triathlon.

Last year pa nagsasanay si Richard sa naturang sport at magpapatuloy ang kanyang training ngayon taon at pagsali sa ilang paligsahan kaugnay nito.

Samantala, deserving daw kung sino man sa limang natitirang celebrity castaways ang magwawagi bilang Celebrity Sole Survivor, ayon kay Richard. — FRJimenez, GMA News

Na-deport diumano ang singer na si Christian Bautista mula sa Indonesia dahil sa paglabag daw nito sa 30-day visa regulation ng bansa.

Ayon sa ulat ng Jakarta Globe nitong Enero 26, kinuwestiyon ng immigration officers ng Indonesia ang multi-awarded Pinoy singer dahil sa pagpe-perform nito sa Lippo Karawaci noong Miyerkules, Enero 25, kahit na free tourist visa lamang ang kanyang pinanghahawakan nang dumating siya sa bansa noong araw ring iyon.

Ayon sa Immigration official ng Indonesia na si Herawan Sukoaji, mahigpit na ipinagbabawal sa kanilang bansa ang pagtatrabaho ng mga dayuhan na tanging tourist visa lamang ang hawak.

Dahil sa kanyang paglabag, hindi na raw mapahihintulutang pumasok sa Indonesia si Christian sa loob ng anim na buwan.

Sa isang follow-up report na inilabas ng Jakarta Globe nitong Enero 27, sinabi na nakatakdang bumalik ng Pilipinas mula sa Indonesia 30-year-old singer ngayong gabi, Enero 27, sakay ng Singapore Airlines.

Sabi pa ni Herawan, “Christian’s departure to Soekarno-Hatta International Airport will be escorted by investigators from the Directorate General of Immigration.”

Samantala, nilinaw naman ni Herawan na “working visa” ang hawak ni Christian noong mga unang bisita niya sa kanilang bansa.

Nakilala si Christian sa Indonesia dahil sa kanyang hit single na “The Way You Look at Me.”

“NOT DEPORTED.” Sa kabilang banda, hiningan naman ng PEP.ph (Philippine Entertainment Portal) ng panig ang STAGES, ang talent management na humahawak sa showbiz career ni Christian sa Pilipinas.

Sa text message na ipinadala ni Carlo Orosa sa PEP managing editor na si Karen Pagsolingan ngayong Biyernes ng gabi, nilinaw niya na hindi na-deport ang kanilang talent.

Sa katunayan, nakatakda pa umanong bumalik si Christian sa Indonesia sa Pebrero para sa isang Valentine show.

Dagdag naman ng isang source, walang batas na nilabag ang Pinoy singer. Lahat daw ng kanyang business requirements sa Indonesia ay inaasikaso ng kanyang agent.

Ito ang kabuuang statement ng STAGES:

“Christian Bautista was not deported. Whatever immigration problems encountered were legally settled. He entered Jakarta last January 25 to do a special show and guest in a TV show. In fact, Christian trended again in Indonesia because of that guesting.

“He is on his way to Singapore and will be back in Manila tomorrow. He will be back in Indonesia for a Valentine show at the prestigious Hotel Mulia.” — Nerisa Almo, PEP